ASTEBURUKO PARTIDA

Bi puntu baino gehiago balio dituen garaipena eskuratu zuen pasa den asteazkenean Arrate Eibar Eskubaloi taldeak Romo Broker Kirolen kantxan (31-32). Gauzak gaizki jarri zitzaizkien arren, armaginek markagailua irauli ondoren poltsikoratu zituzten puntuak. Lehen postuan sendo jarraitzen du talde eibartarrak, neurketarik galdu gabe eta egoera zailetan ere ondo moldatzen dela erakutsi zuen beste behin. Mikel Zuloaga izan zen armaginen goleatzailerik onena 9rekin eta bostgarren postuan da pitxitxien taulan 60rekin guztira. Hala ere, ez dago ospakizunetan murgiltzerik, larunbatean liga txapelketako beste hitzordu bat daukate eta Fernandoren mutilek eta. Beti Onak izango da aurkaria eta lehia goizeko 12etan hasiko da. Hirugarren neurketa zazpi egunetan eibartarrentzat, prestatzeko ia denborarik gabe, bolada onari jarraipena ematera kantxaratuko dira

Hamaikagarren postuan dira nafarrak hasiera gorabeheratsu bat eta gero. Hiru neurketa besterik ez dituzte irabazi eta bi galtzetik datoz Ipuruara, hala eta guztiz eibartarrak ezin dira fio eta hasieratik irabaztera irten beharko dira asteazkenekoa errepika ez dadin. Lander Etxarri Ruiz de Galarreta da kanpotarren goleatzaile nagusia eta adi ibili beharko da defentsa armagina berarekin. Iaz bi norgehiagokak irabazi zituen talde eibartarrak eta aurten bi puntuak Ipuruan ustea dute helburu lehen neurketan.

Emakumezkoen Arrate Eibar Eskubaloiak, aldiz, bigarren itzulia hasiko du larunbatean Bera Bera taldearen aurka arratsaldeko 20:00etan donostiko Bidebieta kiroldegian. Lehen postuan da, neurketa guztiak irabazi ditu eta helburua betetzear da talde armagina, baina oraindik bost neurketa geratzen dira eta ezin dira fidatu. “Partidu zaila espero dugu. Ez dute partidurik galdu etxean eta talde oso indartsua daukate, batez ere erasoan”, dio Andoni Perez entrenatzaileak. Bigarren dira sailkapenean donostiarrak lau puntutara eta lehen itzuliko neurketa eibartarrentzat izan zen Ipuruako lehian. Dena den, badakite eibartarrek zein den irabazteko gakoetariko bat. “Lan asko edukiko dugu defentsan eta atzeko lanak ondo egiten baditugu bi puntuak etxera ekartzeko aukerak izango ditugula argi daukagu”. Karmele Hurtado eta Nagore Ruiz baja izango dira larunbatean, orkatilan lesio bana daukatelako. Hala ere, konfiantzaz gainezka dira Andoni Perezen neskak.

Senior mutilak             Indupime Basauri-Arrate Eibar Eskubaloia B       LAR 18:15         Artunduaga kiroldegia, Basauri

Jubenil neskak              Arrate Eibar Eskubaloia- La Salle-Saieko             LAR 10:00         Ipurua

Kadete neskak              Inmo Azkue Pulpo-Arrate Eibar Eskubaloia         LAR 13:15         Lubaki kiroldegia, Zumaia

Kadete mutilak             Aukera electrónica Hondarribia-Arrate Eibar Eskubaloia B IGA 10:00 Hondartza kiroldegia, Hondarribia

Infantil neskak              Aloña Mendi-Arrate Eibar Eskubaloia                            LAR 12:15 Zubikoa kiroldegia, Oñati

Infantil neskak              Arrate Eibar Eskubaloia B-Aiala C Zarautz                       LAR 12:45 Universidad Laboral

Infantil mutilak             Arrate Eibar Eskubaloia-Bergara                                    LAR 11:30 Universidad Laboral

Infantil mutilak             Arrate Eibar Eskubaloia B-Bideosoa Bidasoa Irun B         IGA 10:00 Ipurua

Senior beteranoak        Arrate Eibar Eskubaloia-Veteranos Urdaneta                  IGA 11:45 Ipurua