ANE MONTIEL – ELKARRIZKETA

Esan dezakegu Ane Montielek denboraldi bikaina izan duela, baita erremate bikaina jarri diola kurtsoari ere, bai seniorren lehen taldearekin bigarren zilarrezko maila mantenduz azken segunduan eta arrakasta lortuta ere infantilekin. Berarekin hitz egiteko aukera izan dugu eta nola joan ziren azken momentu erabakiorrak kontatu digu.

• Zorionak Ane, a ze denboraldia egin duzutena. Liga berri eta konplikatuan salbatu eta Gipuzkoako kopa poltsikora. Zer moduzko hilabeteak izan dira?

Egia esanda, ilusio handiarekin hasi eta amaierararte horrela mantendu gara. Esan beharra dago ez direla hilabete errazak izan eta lan asko egon dela guzti honen atzean. Partidu askotan dena eman arren ezin izan ditugu puntuak eskuratu eta hori onartzea askotan zaila izaten da, hala ere, aurretik esan bezala, ilusioz beteta mantendu gara eta batez ere taldean sinisten jarraitu dugu astez aste. Hori horrela, azken momentuan izan arren, ligako helburua lortu eta maila mantentzea lortu ondoren, Gipuzkoako koparekin amaitu dugu denboraldia.

• Kopako maisutasuna izugarria izan da. Txapelketako neurketa guztiak irabazita eskuratu zenuten garaikurra. Nola joan zen lehiaketa?

Liga amaierak emandako arnas gunea aprobetxatuz, gure helburua denboraldia borobiltzea zen eta horrela izan da kopako lehiaketa. Esan beharra dago, aurkariak Euskal ligakoak izan direla. Aurreko urtean gu maila horretan egon ginen eta maila ezberdintasun handia dagoela igarri dugu eta honekin batera gure taldeak eman duen aurrera pausuaz jabetu gara. Finalean gure mailako aurkaria izan genuen (Elgoibar). Partida ona egin eta, batez ere, bigarren zatian erraz joan ginen markagailuan aurretik.

• Ligara itzuliz, azken unean lortu zenuten helburua. Zelan bizi zen Lagunaken aurkako azken neurketa epiko hori? Urduri ala ziur zeundeten zuen aukeretaz?

Nik uste urduri ez egotea ia ezinezkoa zela, nahiz eta taldean sinistu denok geunden urduri eta hori guretzat garrantzitsua den seinale ere bada. Aukera zabala zen, bi taldeak geunden liga mantentzeko lehia horretan eta talde bakoitzaren esku zegoen guztia. Aste guztian elkarri galdera ezberdinak egiten genizkion eta egia esanda taldekide guztiak konfiantza osoarekin bertaratu ginen partida egunean, egindakoaz harro eta merezitako lekuan geratzeko gogoekin.

• Eta azken segunduak, emozioz beteriko uneak izan ziren…

Aurreko astetik bagenekien berdinketak ere balioko zigula, hala ere, inola ere ez genuen imajinatuko horrelakoa izango zenik partida. Orokorrean neurketa guztian zehar emozioz beteriko uneak bizi izan genituen eta bai, bereziki amaierako segundoak nahiko gogorrak izan ziren. Urduritasuna  jokoan igarri zen eta momentu batzuetan partida amaiera heltzea besterik ez genuen nahi.

• Beraien azken kontraerasoa, hutsartea, nola ikusi zenuten zuek jokaldi hori eta nola igaro zenuten zuen hutsartea?

Aurkari bat gure atezainaren aurrean jaurtiketa egiteko prest eta hutsartea. Momentu horretan opari bat izan zen hori guretzat eta beraz, hutsarte hori defentsarako lanak prestatzeko erabili genituen. Defentsa horretan erabakiko zen partida, azkenean ez ziren segundo asko gelditzen eta ia ezinezkoa izango zen beraiek sartu ezkero guk erasorako aukera izatea. Hori horrela, intentsitate guztia defentsa horretan jarri behar izan genuen eta beste behin ezinezkoa zirudien hori egitea lortu genuen.

• Zaleen bultzada ere sentitzen zen jokalarien artean?

Dena jokoan eta partida etxean edukitzea guretzat oso berezia izan zen. Kiroldegian jende asko zegoen eta guztiak animoak emateko prest. Benetan eskertzekoa izan zen zaletuen jarrera, eta hori guretzat oso motibagarria da beti. Esan beharra dago, partida guztietara etorri diren horiek garrantzi berezi bat dutela guretzat eta astebururo beraien babesa sentitzea berezia eta beharrezkoa izan dela.

– Bigarren urteko infantilekin ere arrakasta lortu duzu entrenatzaile bezala. Kontaiguzu zer den lortu duzutena.

Bai. Lehenik eta behin Gipuzkoako final erdietara sailkatzea lortu genuen eta finalean sartu arren, ez genuen garaipena lortu. Hortik, Euskadiko txapelketan parte hartzea lortu genuen eta 4. postua lortu genuen bertan. Hori dela eta, Espainiako txapelketarako sailkatu eta Camargon, Kantabria, egon ginen txapelketa hori jokatzen. Bertan 4.postua lortu genuen.

Esan beharra dago opari bat dela horrelako jarrera duten jokalariekin lan egitea eta beraiek ere merezitako oparia jaso dutela. Benetan asteburu ahaztezina izan zen guztiontzat.

        – Konfirmatu dezakegu, orduan, denboraldi borobila izan dela zuretzat?

Bai, horrela da. Bi taldeetan lortutakoarekin oso pozik nago. Sufrimendu pixkat batekin izan bada ere, seniorren taldearekin helburua lortu dugu eta gainera, infantilen taldearekin Espainiako txapelketa batean parte hartzeko aukera izan dut.

• Orain merezitako oporrak, baina datorren denboraldiari begira, lehen taldean jarraitzeko asmoa?

Orain deskonektatzea tokatzen da. Denboraldia luzea eta gogorra izaten da, beraz, arnasa hartzeko momentua da orain.

Datorren denboraldiari begira lehen taldean jarraituko dut,  oso eskertuta eta gogotsu nago.

• Nola ikusten duzu lehen taldearen kurtso berria?

Argi daukat hurrengo denboraldian gehiago gozatzeko aukera izango dugula. Aurten esperientzia pixka bat hartu dugu eta hori baliagarria izango zaigu datorren denboraldiari aurre egiteko. Taldea gogotsu ikusten dut, eta dagoen talde giroarekin edozein lekutara heldu gaitezkela argi daukat.

• Entrenatzaile lanean jarraitzeko asmoa ere?

Bai. Aurten kadete neskak entrenatzeko asmoarekin.

• Zer ondo, ze helbururekin?

Bigarren entrenatzailea izango naiz eta taldea beste modu batean laguntzea da nire helburua (jokoan hainbeste zentratu gabe, hori lehenengo entrenatzailearen esku geratzen da).