Bueltan da eskubaloia

Bueltan da eskubaloia eta gabonetako geldialdia eta gero prest dira gure neska-mutilak erronkeri berriz ekiteko eta denboraldiaren bigarren zatia jokatzeko. Emakumezkoen Arrate Eibar taldeak izango dira protagonistak hurrengo asteburuan. Ipuruan arituko dira lehenengo bi taldeak, larunbatean hain zuzen ere. Bigarren taldeak Ereintza Beissierren bisita jasoko duen bitartean arratsaldeko 16:30etan, lehen taldeak Ereintza Aguaplast izango du aurkari bi ordu geroago, 18:30etan. Bi puntu bakarrik lortu dituzte errenteriarrek, beraz, hori aprobetxatu eta garaipenaren bila kantxaratu beharko dira gure neskak. Lehen postuan dira, Bera Bera taldearekin 12 punturekin berdinduta, hori bai, donostiarrek partidu bat gehiago jokatu dute. Hiru jardunaldi geratzen zaizkie eibartarrei, sailkapena lortzeko nahiko eta soberan.

Hori bai, taldea ez da ehuneko ehunean heltzen larunbateko hitzordura. “Covida dela eta ez dela, ez gara heltzen guk nahi genuen bezala. Ezin izan dugu apenas entrenatu gabonetan, baina suposatzen dut talde gehiago egoera berdinean egongo direla”, dio Andoni Perez entrenatzaileak. Aurkari beraren lehen itzuliko garaipenak ere motibazio puntu bat emango die eibartarrei. “Partidu gogorra espero dugu, nahiz eta han erraz irabazi, arazoetan jarri ziguten momentu batzuetan”, ez da fio Andoni.

Malen Aja kapitaina ezingo da taldekideekin egon eta baja izango da, gainera, Andonik ez du jakingo azken unerarte ze jokalarirekin kontatu dezakeen Covida dela eta. Hala eta guztiz, motibatuta dira gureak. “Neskak gogoz dira eta ziur naiz topera irtengo direla bi puntuen bila”. Bigarren taldea aldiz, sailkapenaren erdi partean da eta 12. puntuaren bila kantxaratuko dira larunbatean Ereintza Beissierren aurkakoan. Irabaziz gero, aurrera pauso handi emango lukete eibartarrek.

Gogoratu beharra dago gizonezkoen talde nagusiek atseden hartuko dutela asteburuan eta ez dira kantxetara itzuliko hilaren 15 arte. Azpimarratzekoa ere Arrate Eibar taldeen etxeko partidak zuzenean taldearen Youtube kanalean ikusgai egongo direla. Hauek dira gure taldeen aste-bukaerako beste neurketak:

• Jubenil neskak La Salle-Saieko-Arrate Eibar Eskubaloia IGA 10:00 La Salle kiroldegia, Donosti
• Jubenil neskak Usurbil-Arrate Eibar Eskubaloia LAR 13:00 Oiardo kiroldegia, Usurbil
• Kadete neskak Arrate Eibar Eskubaloia-Aiala A LAR 11:45 Ipurua
• Kadete neskak Cartonajes Arregi Aloña Mendi-Arrate Eibar Eskubaloia B IGA 10:30 Zubikoa kiroldegia, Oñati
• Kadete neskak Irauli Eskubaloia BI-Arrate Eibar Eskubaloia B LAR 13:00 Paco Yoldi kiroldegia, Donosti
• Kadete mutilak Arrate Eibar Eskubaloia-Egia Eskubaloia LAR 10:00 Ipurua
• Infantil mutilak Amenaba A Zarautz-Arrate Eibar Eskubaloia LAR 17:30 Lizardi kirol aretoa, Zarautz
• Infantil mutilak Urola-Arrate Eibar Eskubaloia IGA 11:00 Ispilla kiroldegia, Zumarraga