Porrota, liga amaitzeko partida bakarraren faltan

Joan den larunbatean, Lehen Mailako Mek Eibar Eskubaloiak Tolosa hartu zuen Ipuruan (22-31), emozioa iragartzen zuen lehia batean, nahiz eta etxekoentzat emozioa bat-batean aldatu zen.

Partidaren hasieratik, Tolosak bere nagusitasuna erakutsi zuen kantxan. Bere defentsa zeharkaezinak eta joko erritmo bizkorrak bere kalitate tekniko eta taktikoaren berri eman zuten, bai maila indibidualean bai kolektiboan.

Bestalde, Eibar Eskubaloia, aurkariaren jokoa ezagutzen zuena, Tolosaren jokoak eta ospeak jota zegoela zirudien. Fernando Fernandez entrenatzaileak azaldu digunez, gehiegizko errespetuarekin sartu ziren partidara, eta horrek euren bertsiorik onena zabaltzea eragotzi zien. Defentsan, bat-baten kontrakoan gainditu zituzten, eta ez zuten behar adinako sendotasunik izan defentsarako laguntzetan; erasoan, berriz, egoerak ez zuen hobera egin, harresi gaindiezina aurkitu baitzuten eta ez baitzuten zorterik  izan jaurtiketetan.

Eibartarrek borrokan jarraitzeko ahaleginak egin zituzten arren, momenturen baten ere ez zuten Tolosa estutzerik lortu. Markagailuko aldea azkar handitu zen eta partidu osoan zehar mugitu ezinda mantendu zen. Hala ere, porrotaren itzalen artean, Bernat gaztea eta Alex hasiberria nabarmendu ziren, taldearen etorkizun oparoa agerian utziz.

Gogora dezagun Mek taldearentzat denboraldia oraindik ez dela amaitu. Azken partida dute aurretik Uharteren aurka, denboraldia zapore onarekin amaitzeko aukera. Ziur hurrengo partidu honetan, Mek taldeak bere benetako balioa erakutsiko duela eta dakien guztiarekin borrokatuko dela goi mailako lehiaketari agur esateko. Tolosaren aurkako porrota atzean utzi eta errespetua eta miresmena merezi duen taldea dela erakusteko aukera paregabea izango da.