Asteburu bizia Mek Eibar Eskubaloiarentzat

Mek Eibar Eskubaloia gizonezkoen taldeak laugarren garaipena lortu zuen BM Utebo VG-ren aurka (29-24). Lehen zatian, eibartarrek ikusleen beldurrak airean jarri zituzten, izan ere, zaragozarrek abantaila irabazi zuten gureek jaurtiketetan hainbat akats egin ondoren eta defentsan izan zuten kontzentrazio faltaren ondorioz. Hala ere, bigarren zatian Mek Eibar Eskubaloia taldeak segurtasun handiagoz jokatu zuen bai erasoan eta defentsan, eta horrek garaipena ekarri zien, Eneko Rivero atezainaren lan nabarmengarriari esker.

Zilarrezko Ohorezko Mailako emakumezkoen taldeari dagokionez, porrota jaso zuten Loizaga Const Castro Urdialesen aurka (31-26), partida hasiera sendoa izan zuten arren. Lehen erdia kontraerasoek eta ziurtasunez beteriko posizio-erasoek markatu zuten. Aurkaria geldiarazteko zailtasunak izan arren, erasoak gol aukera onak sortu zituen, atsedenaldian berdinketa bat lortuz (14-14). Bigarren zatian, Mek Eibar Eskubaloia taldeak ezin izan zuen nagusitasun numerikoa aprobetxatu eta Castro Urdialesek aurrea hartu zuen markagailuan. Presa eta erabaki okerrek Eibarko taldearen porrota ekarri zuten, nahiz eta Nahia Benitezek 6 gol sartu zituen eta Irati San Martin jubenilak 3.

Datorren asteburuan, neskek Beti-onak taldearen aurka jokatuko dute Ipuruan, sailkapenean postu berean dagoen taldea.