Español 
Gizonezkoen Arrate Eibar Eskubaloiak ere asko borrokatutako garaipena poltsikoratu zuen Ipuruan Inmobiliaria ezker aldea Barakaldo taldearen kontra, beheko postuetan sailkatuta bada ere, aurpegia eman eta armaginei zail jarri zizkieten gauzak. Hala ere, duten kalitatea agerian utzi zuten eibartarrek beste astebetez, 11. garaipena eskuratzeko eta lehen postua bermatzeko. Bigarren da Sugraf Zaragoza bost puntu eta neurketa bat gutxiagorekin. “Beste partida bat non arerioak dena ematera derrigortzen gaituena, eta horrek, liga txapelketa ze lehiakorra den erakusten du”, zioen Fernando Fernandez entrenatzaile armaginak. Gainera, talde bizkaitarra goresten du Fernandok. “Gu, liderrak izanik, ezin izan genuen markagailua irauli 40. minuturarte beheko postuetan den talde baten aurka”.
Zoragarri hasi zuten norgehiagoka bizkaitarrek, aginte makila hartuta, bizpahiru goleko aldeaz gozatu zuten lehen zati osoan zehar; eta behin eibartarrak suspertuta, ia bukaerararte eutsi zioten emaitzari. “Barakaldoren partida oso ona izan zen. Goraipatzekoa ere atezainaren gelditu zoragarriak”. Dena dela, luze egin zitzaion lehia talde horiari eta bigarren zatiko aurreneko 15 minututan bi gol sartzea besterik ez zuten lortu, etxekoen harresiarekin behin eta berriz topo eginaz. “Jaurtiketa errez ugari huts egin genituen berriz, baina ez genuen amore eman eta defentsaren lan bikain baten ondoren, erritmoa bizkortu eta markagailua iraultzea lortu genuen”. Lander Casado izan zen norgehiagokako jokalaririk onena 11 gol sartu ondoren. “Lander goraipatzea nahiko nuke, lesioegatik %100 ez bazegoen ere partida bikaina burutu zuen”.
Bi puntu baino gehiago balio zuen garaipena lortu zuen Arrate Eibar Eskubaloiak pasa den larunbatean Helvetia Anaitasunaren kantxan (30-33). Lanean eta borrokan oinarritutako garaipena izan zen, zuten aukeretan sinistu eta bi puntuak etxera ekartzea lortu zuten eibartarrek. Horrela, lehen postuan sendo jarraitzen du talde armaginak 21 punturekin, Sugraf Zaragoza baino 5 gehiagorekin, hori bai, partidu bat jokatzeke du talde aragoiarrak.
Oso lehia estua bizi zen iruñan, non bi taldeek eskubaloi erakustaldi ederra eman zuten. "Neurketa gogorra, erritmo handiarekin eta lasaitzeko denborarik gabekoa. Oso gaizki hasi gara, lehenengo jaurtiketak, bi zutoinera eta bi gelditu egin digute, hori dela eta markagailuan aldea zabaldu dute hasieratik eta ez gara kapazak izan lehen zatiaren amaierarate aldeak murrizteko", zioen Fernando Fernandez, entrenatzaile armaginak behin norgehiagoka bukatuta. Atzetik iritsi ziren atsedenaldira eibartarrak, larritasuna arinduz. Diferentzia handitzen zuten bakoitzean etxekoek, berriz hurbiltzen ziren Fernandorenak, hala ere, Anaitasuna aurretik lehenengo 30 minutuak eta gero.
Dena dela, bigarren zatia bestelakoa izan zen eta armaginek, berdintzeaz gain, markagailua irauli eta aurretik jartzea lortu zuten, beste behin erakutsiz talde honek ederki dakiela jokatzen momentu txarretan, duen kalitatea kanpora ateratzen, alegia. "Denetan hobetu dugu bigarren zatian, gain-azpi egin markagailuan eta Anaitasunaren presioa gainditu dugu; gainera, etxeko entrenatzailearen 7x6 taktika gaindituz, aldea eustea lortu du taldeak" zioen harro Fernandok. Lander Casado izan zen neurketako goleatzailerik onena 8rekin. Goraipatu talde osoaren eraginkortasuna, guztira 11 armaginek gutxienez gol bat egitea lortu zuten eta. Datorren larunbatean Inmobiliarias ezker aldea Barakaldo izango da Ipuruan.
Berri onekin hasita, gizonezkoen bolada onari buruz hitz egin behar dugu. Beste garaipen itzel bat liga txapelketan, Ipuruan oraingotan, bederatzigarrena 10 neurketetan. Ondo eutsi zion lehenengo zatian talde nafarrak, etxekoen hutsak kontraerasoetan aprobetxatuz. Hiru gol aurretik egon ziren kanpotarrak eibartarrak estu hartuz. Baina 6-1eko partzialak abentaila eman zion berriz ere gure taldeari atsedenaldia baino lehen. Bigarren zatian defentsa gogortu eta aldea zabaltzea lortu zuten armaginek, azken minutuetan lasaiago eta presio gabe jokatuz. Lander Casado (7), Asier Urain (6) eta Axier Gisasola(6) izan ziren gure goleatzailerik onenak; Lander Etxarri neurketakoa 9rekin; gure atezainak ere goraipatu behar ditugu, geldiketa zoragarriak egin zituzteen eta.
Lidergoan dira, Sugraf Zaragozarekin berdinduta Fernandorenak 13 punturekin, eta 8rekin, bakarrik, neskak bigarren postua 2 azpitik dutelarik.
Aste-bukaerara itzulita, ospe handiko garaipena lortu zuten gizonezkoek Trapagaran, aurten mailaz jaitsi den taldea menderatuta. Kontrolpean izan zuten norgehiagoka Fernandoren mutikek, nahiz eta hasieran asko asmatu ez: “Aste zaila izan da, jokalari batzuk ikututa zeuden eta joan zen asteko geldialdiak ez zigun lagundu, hala eta guztiz, taldeak ondo erantzun du. Huts batzuk egin ditugu neurketaren hasieran erasoa, hala ere, 20. Minutuan aldea zabaldu eta bukaerararte 4-5 goleko errentarekin ibili gara”, kontent zen armagiñen entrenatzailea. Lehia estuagoa izango zela aurreikusten zen eta hasierako minutuetan ere hori zirudien, baiña eibarrarrek arazo askorik gabe kontrolatu zuten norgehiagoka. “Garaipen garrantzitsua, sailkapenaren goialdean arituko den talde oso on baten aurka”.
Lehenago aipatu bezala, defentsa zorrotz batek bideratu zien etxekoei garaipena; gaiñera, atepean egindako lanak ere bere fruituak eman zituen. “Goraipatu Mikel Solar atezaiñaren neurketa, baita defentsaren lana, kontraerasoan irtetzeko aukera ematen zigun horrek”, zioen Fernandok. Dena den, erasoan erakutsitako eraginkortasunak ere asko lagundu zuen, Mikel Zuloagak 8 gol egin zituen, neurketako goleatzaile onena bilakatuz. Bi puntu baiño gehiago balio duen garaipena.
Gizonezkoek , aldiz, sari bikoitza lortu zuten larunbatean Ipuruan Jacar San Antonioren kontra (29-19). Bi puntuez gain, lidergoa ere eskuratu zuten Fernandoren mutilek arerio zuzenen porroten ondoren. Maisuki nagusitu ziren gure bi taldeak eta denboraldi hasieran finkatu zituzten helburuak betetzeko bidean dira, hala ere, honek hasi besterik ez du egin eta lanean gogor jarraitu beharko dute gure neska-mutilek.
Gizonezkoen Arrate Eibar Eskubaloiak ere arrakasta lortu zuen larunbatean Jacar San Antonio taldearen kontra. Horretaz gain, lehen postuan dira orain gure mutilak HelvetiaAnaitasunak eta Trapagaranek ezin izan zuten irabazi eta. Bikain aritu ziren eibartarrak, hasieratik nagusituz, berehala handitu zuten aldea markagailuan. “Aurten etxean jokatzen dugun lehen neurketa serioa eta erregularra izan da, hasieratik bukaeraraino. Entrenatzaile guztiori gustatzen zaiguna, defentsan gol gutxi jasoaz eta aurrean aukerak sartuaz”, kontent zen Fernando lehia behin bukatuta. Talde garaipen itzela izan zen, goitik behera gailendu ziren armaginak joko zoragarri eta erakargarria eginez. “Gainera, norgehiagoka entretenigarria izan da, non jokalari guztiek bere aletxoa jarri dutena; nabarmendu Alex Puentejubenilak minutu gehiagoz gozatzeko aukera izan duela gol bat sartuz”. Hau da, azken neurketetan ohikoa den bezala, zoragarri banatu ziren golak jokalari guztiak, lan talde ezin hobea erakutsiz beste behin. “Garaipenari, HelvetiaAnaitasuna eta Trapagaran taldeen porrotak batzen badiogu asteburu perfektua izan dela esatekotan gara.” Hori ba, Fernandok esaten duen bezala, asteburu ezin hobea Arrate Eibar Eskubaloi taldeentzat. Lander Casado eta Asier Urain bilakatu zuren goleatzaile nagusiak 5 golekin. RomoBroker Kirol taldearen kantxa bisitatuko dute eibartarrek datorren igande goizean zazpigarren jardunaldiari dagokion partiduan.
Balio askoko beste bi puntu eskuratu zituen Arrate Eibar Eskubaloiak aste buru honetan Egia Teila Fabrika taldearen kantxan (23-34). Hirugarren dira eibarrarrak 9 punturekin, Helvetia Anaitasuna eta Trapagaran taldeen azpian eta galdu gabe jarraitzen dute gure mutilek. Larunbatean nagusitasun osoz gailendu ziren, hasieratik joko ikusgarria eginez, ez zioten aurkariari aukerarik eman. “Oso kontzentratuta hasi dugu neurketa, instentsitate handiarekin, hori dela eta, markagailuan berehala zabaldu dugu aldea atsedenaldira 10-20 iritsiz”, zioen Fernando Fernandez entrenatzaileak. Ildo beretik jarraitu zuen bigarren zatiak, aginte makila hartuta armaginak, aldea zabaltzea lortu zuten, donostiarrak zailtasun handirik gabe menderatuz. “Tolosaren aurkakoarekin alderatuta, diferentziak mantentzea lortu ditugu bigarren zatian”, kontent zen Fernando taldeak erakutsitako jarrerarekin.
Eskubaloi festa polita bizi izan zuten Egiako kiroldegira gerturatu zirenak. Kirol hau zaletu gabe ez litzateke ezer izango eta donostiarrek eskubaloia gozatzen dutela erakutsi zuten beste behin larunbatean. “Jende pila gerturatu da gaur eta izugarrizko giroa zegoen kantxan”. Hauexek izan ziren Fernandoren lehenengo hitzak norgehiagoka bukatuta. Hala ere, ez ziren kikildu eibartarrak eta nagusiki menderatu zuten Egia. “Egiaren pistan emaitz hau lortzea lorpen izugarria da, eta horrek talde guztiaren kontzentrazio, intentsitate eta joko bikaina adierazten du”. Armaginen aldetik hamaika jokalarik gutxienez gol bat sartzea lortu zuten, taldearen maila agerian utziz berriro ere. Lehiako goleatzaile nagusia etxeko Mikel Royo izan bazen ere, Mikel Zuloaga (6), Jon Barruetabeña (6) edota Lander Casado (5) jokalarien artean, besteak beste, aldea zabaldu eta larritasun gabe egin ziren bi puntuekin.
