Behar-beharrezko partida

Larunbat honetan, 18:30etan Ipurua estadioan, Mek Eibar Eskubaloia Zilarrezko Mailako taldeak Loizaga Castro Urdialesen aurka jokatuko du.

Loizaga Castro Urdialesek eskarmentu handia du zilarrezko mailan, ohorezko mailan bere balioa probatu duten hiru jokalariren babesarekin. Erasoa bere indargunea da, bereziki lehen lerroan eta pibotearekin duen jokoan nabarmentzen da, eta hori mehatxu larria da eibartarrentzat.

Bestalde, Mek Eibar Eskubaloia taldeko jokalariek defentsa sendoa egin eta ondo kontzentratu egin beharko dute. Prest egongo dira etengabeko laguntzak eskaintzeko eta aurkariaren erasoei aurre egiteko. Etxeko taldeak jokoari abiadura ematea espero da, Castrok defentsan izan ditzakeen ahuleziak aprobetxatuz 6 metroetatik jaurtitzeko aukerak sortzeko.

Partida honen garrantziaz jabetuta, Mek Eibar Eskubaloiak denboraldiko azken txanpari erabakitasunez aurre egingo dio, neurketa bakoitza final bat balitz bezala jokatuz taulan duen posizioa hobetzeko. Amaia San Martin hamaikakora itzultzeak, gainera, beste bultzada bat emango dio taldeari, egungo egoera iraultzea eta sailkapenean postuak igotzea espero baitute.

Ipuruako giroak emozioz eta tentsioz beteta egongo dela dirudi, bi taldeak kantxan dena emoteko prest baitaude garaipenaren bila. Zalantzarik gabe, norgehiagoka honek zazpi finaleko sail baten hasiera markatuko du Andoni Perezen neskentzat, beren joko dinamika aldatu nahi baitute.

Mek taldeko Lehen Mailako taldeari dagokionez, etxetik kanpo jokatuko du Anaitasuna indartsuaren aurka. Aurkari honen kontra 25-22 irabazi ondoren, eibartarrek badakite erne ibili beharko dutela eta lehiakortasun maila altua erakutsi beharko dute bolada positiboari eusteko eta norgehiagoka berri honetan aldeko emaitza ziurtatzeko.